Francis LABARTHE

Ua grana virada, un pont, un passatge tranquille

Au Ginx qu'atz l'impression d'esta luenh de la vila

Me que troberatz s'atz hami o s'atz set

Ua assieta de sopa, chabrot, ua cueisha de poret.

E lo maire d'Arua dehens lo son obradèr

Lo paroir a la man e lo son gran davantèr

Que faiçona esclòps, lo dessenh qu'ei tan beròi

Tot aquò que sent bon, que sent tant bon lo bòi.

Mei tard e hòrt mei tard, los joens que seran vielhs

Tournan passar au Ginx, soviers e nostalgias

Deu molin cercaran lo camin carretèr

Mes ni avera pas mei, ni auberga, ni esclòps, ni molièr.

Poëma escrivut per Paul Boydron, molier au Ginx en omatge

a Paul Labat maire de Arua e esclopèr au Ginx

VIEILHS AMICS

Amics, despuish longtemps n'am pas devisat amassas

De tot çò qui portam estujat en lo còr

Tant qu'un saunei de nueit noste vita que passa

Que'ns deishudam vielhòst, mes esbérits per aquò.

Sede't au ras de jo, hica la toa man dens la mia

Los peus que'm son caduts, los tons n'an pas blanquit

Doçament, dinc au cap, lo Seinhor que t'aima

Tostemps vienant de còr, tostemps leugèr d'esperit.

Et soviens de d'auts còps, mon brave camarade ?

Nat varat de trop haut, nat camin trop estret !

Be n'am com joens porins, heit beròjas camadas

En arrident de tot de Morganx a Haget !

Mes uei, praubes rocins, masedats per noste atge

Atiulats au ras deu huec, qu'atisam los carbons

Per nos tostemps ivèrns, en partin au vilatge

Qu'entenem rebondir de gaujosas cançons.

Puish qu'atau Diu ac vòu cantatz, cantatz, joenessa

Tanleu prima arriba, espiatz los auseròts

Bastint los navèths nids, shens har nada peguessa

L'un au cap d'un píbol l'aute au miei deus bruishots.

Poëma de l'abat Camille Tauzin

Aqueth poèma evoca la nostalgia de la joenessa que s'en va e deu temps qui passa